31 views

ကွန်ပျူတာ ရှေ့မှာထိုင်ပြီး word page တခု ခေါ်ထားပေမယ့် ဘာတစ်ခုမှ ချ မရိုက်ဖြစ်သေးဘူး။ မြင်ကွင်းထဲမှာ လှုပ်စိ၊ လှုပ်စိ ပေါ်နေတဲ့ Cursor ကိုပဲ ကြည့်နေတယ်။ စာရေးရင်းနဲ့ သောက်ဖို့ဆိုပြီး ဖျော်ထားတဲ့ ကော်ဖီကလည်း တော်တော်အေးနေပြီ။ အခုထိ ကွန်ပျူတာ ရှေ့မှာ ထိုင်လို့ ကောင်းနေတုန်းပဲ။ စာရေးချင်နေတယ်။ ဒီနေ့ည ၀တ္တုတို တစ်ပုဒ်လောက် ရေးကြည့်ချင်တယ်။ ဒီတလော အလုပ်များတာရယ်၊ နောက်ပြီး စိတ်သိပ်မပါတာရယ်ကို အကြောင်းပြပြီး စာရေး စာဖတ်တဲ့အလုပ်ကို မလုပ်ဖြစ်တာ ကြာပြီ။ ခရီးထွက်ရမယ်ဆိုတာကို အကြောင်းပြပြီး ဂယောင်ရိုက်နေတာလည်း ပါတာပေါ့လေ။ ဒီနေ့ညတော့ စာတစ်ပုဒ်ကို ရေးချင်နေတယ်။ ကဗျာဆိုရင်တော့ တအားပင်ပန်းလွန်းရတော့ ဒီနေ့ည စာလေးတစ်ပုဒ်လောက်ကို အကြမ်းလောက် တို့ထားဦးမှ။

စာရေးမယ်ဆိုတော့ ချရေးစရာ ကုန်ကြမ်းက စဉ်းစားရပြန်ရော။ အခုလောလောဆယ်မှာ ဘာမှ စဉ်းစားမရဘူး။ ကိုယ့်အကြောင်းကို ရေးရင်ရော..။ ဒီလိုဆိုပြန်တော့ လည်း လတ်တလောမှာ ခံစားချက်က ချရေးစရာ မယ်မယ်ရရ မရှိပြန်ဘူး။ ထိုင်းမှာ ရေကြီးလို့ ပစ္စည်းတွေ ဈေးတက်ကုန်တာကို ညည်းရရင် ကောင်းမလား။ ညနေ အလုပ်က အပြန်ရေချိုးခန်းထဲအ၀င်မှာ ကြားလိုက်ရတဲ့ နှာစီးပြီး တရွှီးရွှီးနဲ့ လေသံမည်နေတဲ့ ဆပ်ပြာရည်ဘူး အကြောင်းရေး ရင်ကောင်းမလား…။ ဟုတ်တယ်…။ ဆပ်ပြာရည်တင် မဟုတ်ဘူး။ အသုံးအဆောင် ဘူးတော်တော်များများက နှာစေးနေပြီ။  သွားတိုက်ဆေးဘူးဆိုရင် ဖင်လေးတောင် လိပ်နေပြီ။ ဒါလေး သွားဝယ် ဖို့တောင် အချိန်က မရဘူး။ အချိန်မရှိတာနဲ့တင် မဟုတ်ပါဘူး။ ၀ယ်စရာ ပိုက်ဆံ နည်းတာကြောင့်လည်း ပါတာပေါ့လေ။

လခစား ၀န်ထမ်းဆိုတော့လည်း ချင့်ချိန်ချွေတာနေရတာ။ ဒီကြားထဲ အပိုကုန်သွားတာတွေကရှိသေးတယ်။ အခုညနေလည်း လိုင်းကား ပေါ်မှာ စပယ်ယာက ၅၀၀ တန်ပေးတာကို ၂၀၀ ပဲ ပြန်အမ်းတယ်။ ၁၀၀ ကို မေ့ချင်ယောင်ဆောင်နေတယ်။ ဒါမျိုး တနေ့ကို ၂ခါမေ့ရင် ၂ ရာ ပိုကုန်တယ်။ တလလုံးဆိုရင်တော့ အနည်းလေး ၅ ထောင် သွားမှာပဲ။။ ငါ့လိုမျိုး လူတော်တော်များများ ခံနေရတာပဲ..။ ရန်ကုန်မှာ လူလာလုပ်ရတာ တော့်တော့်ကို မလွယ်ဘူး။ လိုင်းကားစီးရင်လည်း ပိုက်ဆံပေး စီးရပေမယ့်… စပယ်ယာက မခန့်လေးစား လုပ်ချင်တယ်…။ ကိုယ့်ပိုက်ဆံ ပြန်တောင်းရင်လည်း အော်ချင်ရင် အော်လိုက်၊ ငြူငြူစူစူ ကြည့်လိုက်နဲ့၊ သူတို့ပဲ… အတင်းဆွဲတင်…သူတို့ပဲ အတင်းတွန်းချ။ ကားနှစ်ထပ်ကြားမှာ ညှပ်ပြီး သေသွားရင် ဘယ်လိုလုပ်မလဲ။ တကယ့်ကို မသက်မသာတွေ။ ကြည့်ပါဦး…ဘ၀များ…. ဆိုးပါတယ်…။ ငါ့လိုလူတွေ ဘယ်လောက် များမလဲ။ ဒီအကြောင်းလေးကို စာချရေးဦးမှ။

တကယ်တမ်း ချရေးမယ်လည်း ဆိုပြန်ရော ဘယ်ကနေ စရမယ်မှန်း မသိပြန်ဘူး။ လိုင်းကားကြပ်တဲ့အကြောင်းက စရမလား၊ စပယ်ယာရဲ့ ငေါက်သံနဲ့ စာကို ဖွင့်ရမလား၊ ဒါမှမဟုတ် ပစ္စည်းတွေ ပြတ်တဲ့ အကြောင်းက စရမလား။ လစာလေး မဖြစ်စလောက်ရတဲ့ အလုပ်အကြောင်းက စရမလား။ စဉ်းစား…စဉ်းစား..။ ဒီလိုမျိုး စိတ်ညစ်စရာတွေ ကို ချမရေးချင်ပါဘူး။ ဒီအကြောင်းတွေ ချရေးဖို့ စဉ်းစားရင်လည်း ကိုယ်ပါ လိုင်းကားပေါ် နောက်တစ်ခေါက် ပြန်တက်ရဦးမှာ။ ပင်ပန်းတယ်..။ မဖြစ်ဘူး။ တခြား ပေါ့ပေါ့ပါးပါးဖြစ်မယ့် အကြောင်းအရာမျိုးကို ပြောင်းစဉ်းစား ဦးမှ။

ပေါ့ပေါ့ပါးပါးဆိုတော့ ဆုံးသွားတဲ့ ဘကြီးသန်းအောင်ကို သွားသတိရမိတယ်။ ဘကြီး သန်းအောင်က အဖေဘက်က တော်တာ။ ဘကြီးတို့က ဦးသန်းအောင်ရယ်၊ ဦးသန်းမောင်ရယ်ဆိုပြီး ညီအစ်ကို ၂ ယောက်ရှိတယ်။ ဦးသန်းမောင်က ကျွန်မတို့ရဲ့ အဘိုး၊ ဦးသန်းအောင်ကကျတော့ အဖေ့ဦးလေး၊ ကျွန်မတို့ ဘကြီးပေါ့။ ဘကြီးက ကျောင်းဆရာ။ ရိုးရိုးအေးအေးကြီး။ ဟိုးအရင်တုန်းက ၁၀ တန်းအောင်ပြီးတော့ ကျောင်းဆရာ ၀င်လုပ်နေတာ။ စာသင်တာကလွဲပြီး တခြား ဘာမှမလုပ် တတ်ဘူး။ လူကြီးတွေကလည်း ကျောင်းဆရာလေးဆိုတော့ ဂုဏ်ရှိတာပဲ.. ဘာမှ မလိုဘူးဆိုပြီး ထားထားတာ။ နောက် အရွယ်ကလေးရပြီး အတောင်အလက်စုံတော့ အဘိုးက အရင် အိမ်ထောင်ကျတယ်။ နောက်ကားက အင်ဂျင်ကောင်းတော့ ကျော်တက်သွားတာပေါ့။

အဘိုး အိမ်ထောင်ကျပြီး သိပ်မကြာခင် ရွာမှာ ၀မ်းပျက်တာတွေ တစ်ရွာလုံးဖြစ်ကြတော့ မိဘနှစ်ပါးလည်း ဆုံးသွားတယ်ပေါ့။ အိမ်မှာ မိဘလက်ငုတ်လက်ရင်းဖြစ်တဲ့ လယ်နဲ့ ခြံနည်းနည်းနဲ့ ဘကြီးတစ်ယောက်ပဲ ကျန်ခဲ့တယ်။ ဘကြီးက အူတူတူ အတတဆိုတော့ စီးပွားရေးတွေကို ဆက်မလုပ်တတ်၊ မကိုင်တတ်။ ဒီတော့ ကျန်နေတဲ့ ဒေါ်ကြီး ဒေါ်လေး၊ ဦးကြီး ဦးလေးတွေက စိတ်ပူတယ်။ ဘကြီးရဲ့ စာရေးသောက်ရေးက အစ စီးပွားရေးအဆုံး.. နောင်ရေးအတွက် တိုင်ပင်ကြ တာပေါ့။ နောက်ဆုံးတော့ လက်ငုတ် လက်ရင်းလေးတွေလည်း မပြုတ်ရအောင်၊ အနေအစားလည်း သင့်တော်အောင် ဒေါ်ကြီး အေးမြင့်နဲ့ အိမ်ထောင်ချပေးဖို့ လုပ်သတဲ့။ ဒေါ်အေးမြင့်က အသက် ၃၀ လောက်ရှိတဲ့ အပျိုကြီး။ လုံးကြီးပေါက်လှ။ ရွာလယ်မှာ ကုန်စုံဆိုင်ဖွင့်ထားတာဆိုတော့ စီးပွာရေး လေးလည်း လုပ်တတ် တယ်ဆိုပါတော့။ နေရာချထားပေးမယ်ဆိုပြီး လူကြီးတွေက စီစဉ်တော့ နှစ်ဘက်လုံးကလည်း သဘောတူ ကြည်ဖြူပေါ့။ သတို့သားလောင်း၊ သတို့သမီးလောင်းတွေ က အင်း ချတယ်ဆိုတော့ စီစဉ်စရာရှိတာတွေ စီစဉ်ပေါ့။

ခက်တာက မင်္ဂလာဆောင်ခါနီးအထိ သူတို့ချင်း အေးအေးဆေးဆေး မဆုံရသေးဘူး။ ဒေါ်ကြီးဒေါ်လေးတွေကပဲ စီစဉ်နေကြတာ။ အခုထိ သူတို့ချင်း မဆုံရသေး တာတော့ မဖြစ်ချေဘူးဆိုပြီး စကားပြောရအောင် လုပ်ကြမယ်ပေါ့။ ဒီမှာ ဘကြီးက လူမြင်ကွင်းမှာ စကားပြောရမှာ မျက်နှာပူလို့တဲ့။ ဘာပူစရာရှိလို့လဲ၊ ယူမယ့် လူတွေပဲ ဆိုတာလည်း မရဘူး။ ဒေါ်အေးမြင့်ကို အားနာလို့တဲ့။ ကဲ…ဒါနဲ့ပဲ သူတို့ကို ရွာက ဘုရားမှာ တွေ့လို့ ပြောတာပေါ့။ အဲဒီတုန်းက ရွာဘုရားဘေးမှာ ရှမ်းပြေးရွက် လို့ ခေါ်တဲ့ ခြုံပင်တွေရှိတယ်။ အထဲမှာ ယုန်တွေ ဘာတွေတောင် ဖမ်းလို့ရတယ်ဆိုတော့ ခြုံဘယ်လောက် ထူတယ်ဆိုတာ တွေးသာ ကြည့်တော့။ တွေ့မယ် မနက်ကျတော့ ဘကြီးသန်းမောင်ကို အရင်လွှတ်၊ နောက်မှ ဒေါ်အေးမြင့်ကို လွှတ်လိုက်တယ်ပေါ့။

လူကြီးတွေ စိတ်ထဲမှာတော့ ငါတို့တူက အ တယ်…၊ အတယ်နဲ့ နောက်ဆုံးတော့ ခြုံကို ချိန်းတာပါလားဆိုပြီး တွေးပြီး ပြုံးတုံ့တုံ့ လုပ်နေတာပေါ့။ အဲဒီနေ့မနက် ရွာမှာ ဆွမ်းခံဝင်ပြီး ကတည်းက ဘကြီးတို့သွားတာ ၁၀ နာရီ .. သူတို့ ပြန်မလာ၊ ၁၁ လည်း မပေါ်လာ…ဆိုတော့ စကားကောင်းနေကြလို့ ဖြစ်မယ်ပေါ့၊ လူကြီးတွေက ဒီလိုတွေးတယ်။ နောက်… ၁ နာရီ၊ ၂ နာရီ…။ ဒါဆိုရင်တော့ မဟုတ်တော့ဘူး။… ညနေ ၄ နာရီလည်း ထိုးရော ဒေါ်အေးမြင့်တစ်ယောက်ရွာထဲကို ဘုဆတ်ဆတ်နဲ့ ဒုန်းဆိုင်းပြီးဝင်လာတယ်။ တစ်ကိုယ်လုံးလည်း ချွေးတွေနဲ့ မျက်နှာကိုလည်း မောင်းချီလို့။ ဒါကိုမြင်တော့ လူကြီးတွေက ထိတ်ထိတ်ပျာပျာ ဖြစ်ကုန်တယ်။ ဟိုလူ မောင်သန်းအောင် ဘာလုပ်လွှတ်လိုက်သလဲပေါ့။ လူကြီးတွေက မေးတော့ ဒေါ်အေးမြင့်က မပြောဘူး။ သိချင်ရင် ဟိုလူ့သွားမေး ဆိုတော့… လူကြီးတွေက ရွာထိပ်လိုက်သွားတာ….ဟိုလည်းရောက်ရော…။

ဘုရားလှေခါးခြေရင်းက ရှမ်းပြေးရွက်ခြုံကြီး မရှိတော့ဘူး။ ခြုံနေရာက ရှင်းလို့ လင်းလို့….ဘကြီး သန်းမောင်ကိုလည်း အဲ့ဒီမှာ ငုတ်တုတ်ကြီး ထိုင်နေတာ ကို မြင်တော့  လူကြီးတွေက ဘာများဖြစ်လို့ပါလိမ့်ဆိုပြီး အနားကပ်ကြည့်တာ ဘကြီးကိုလည်း မြင်ရော ဘာမှ မပြောနိုင်တော့ဘူး။ ဘကြီးက တစ်ကိုယ် လုံး ချွေးတွေ ရွှဲပြီး မျက်နှာမှာလည်း နီရဲနေတယ်။ စကားလည်း မေးမရဘူး။ ဒီတော့ ဒေါ်အေးမြင့်ရဲ့ ဦးလေးက ဘာမပြော၊ ညာမပြောဘဲ ဘုန်း ဘုန်းဆိုပြီး ပြေးကန်တော့ လဲသွားတယ်။ အနားက လူတွေက ၀ိုင်းဆွဲပြီး ဘကြီးကို အိမ်ခေါ်လာတယ်။ အိမ်ရောက်လို့ မေးတော့မှပဲ အကျိုးအကြောင်းစုံသိရတယ်။

လူကြီးတွေက တွေ့ဖို့လွှတ်လိုက်ပေမယ့် ဒေါ်အေးမြင့်ကို စပြီး စကားစပြောရမှာ အားနာလို့တဲ့။ ရှမ်းပြေးရွက် အကိုင်းတွေကိုပဲ ထိုင်ချိုးနေတာ။ မနက်တည်းက ချိုးတာဆိုတော့ ညနေလည်း စောင်းရော။ ခြုံလည်း ရှင်းသွားရောပဲ။ သူခြုံကိုင်းတွေကို ချိုးနေတဲ့အချိန် ဘေးနားမှာ ငုတ်တုတ်စောင့်နေရ တဲ့ ဒေါ်အေးမြင့် အဖြစ်ကလည်း ဘယ်လောက်ဒုက္ခရောက်လိုက်မလဲ။ နေပူပူမှာ ရှမ်းပြေးပင်ရဲ့ အပွေးတွေထိတော့ ဘယ်လောက် ယားလိုက်မလဲ။ နောက်ဆုံး စိတ်တိုပြီး ရွာထဲကို ပြန်လာတာသာ ကြည့်တော့။ ခြုံပုတ်ကြီး မရှိတော့တာတော့ ကောင်းတယ်… မကောင်းတာက ဘကြီးအတွက်။ ဘကြီးကို ဒေါ်အေးမြင့်က မယူတော့ဘူး။ အူတူတူ နိုင်လွန်းအားကြီးလို့တဲ့။ ဒါနဲ့ ဘကြီးလည်း သေသာသွားတယ်… အားနာတတ်တဲ့စိတ်နဲ့ပဲ မိန်းမ ရမသွားဘူး။

အဲဒီဘကြီး အကြောင်းကို စီကာပတ်ကုံး ရေးလိုက်ရင်တော့ ၀တ္တုတစ်ပုဒ် ဖြစ်လာနိုင်လောက်ပေမယ့် ဆက်ပြီးစဉ်းစား ကြည့်လိုက်တော့ ကျွန်မမှာ ဘကြီး အကြောင်း ရေးစရာ ဘာမှ သိပ်မရှိတော့ဘူး။ ခုနက စဉ်းစားမိတာလေးက အကုန်ပဲ။ တကယ်တော့ ကျွန်မက ဘကြီး ၀တ်တာစားတာ၊ နေတာထိုင်တာတွေကို သိချင်သေး တယ်။ ဘကြီးကို အတယ်လို့ ပြောကြတယ်မလား..။ အဲ့ဒါ ဘယ်လို အ တာမျိုးလည်း ဆိုတာကို ကျွန်မ သိချင်တာ။ ဒါမှလည်း ဖတ်လို့ပျော်တဲ့ စာတစ်ပုဒ်ဖြစ်လာမှာမလား။ ဒီတော့ ခဏလေး တေးမှတ်ထားလိုက်ဦးမယ်။ အဖေကို သေသေချာချာမေးပြီးမှ စီကာပတ်ကုံးရေးရမယ်။  ရသမြောက်တဲ့ ၀တ္တု ဖြစ်မလာဘူးလို့ ဘယ်သူ ပြောနိုင်မလဲ။

အဲဒီလို တောင်တွေးလိုက်၊ မြောက်တွေးလိုက်နဲ့ စာတပုဒ်ရေးဖို့ အချိန်ယူနေတာ အတော့်ကို ကြာသွားပြီ။ ခုထိလည်း တလုံးမှ ချမရေးရသေးဘူး။ ကုန်ကြမ်းကို ပုံဖော်နေရတာနဲ့တင်ပဲ အချိန်က ကုန်နေပြီ။ မျက်လုံးလည်း နည်းနည်းဝေချင်နေပြီဆိုတော့ ထိုင်နေရာကနေ ထ၊ အိမ်ရှေ့ ၀ရံတာမှာ သွားရပ်ပြီး ဟိုဟို ဒီဒီ ကြည့် လိုက်မိတယ်။ အချိန်က ည ၁၂ နာရီလောက် ဆိုပေမယ့် လမ်းပေါ်မှာ တိုက်ကြီး ကားလေးတွေက အရှိန်ပြင်းပြင်းနဲ့ မောင်းနေကြတုန်းပဲ။ ဟိုင်းလပ်ကား သေးသေးလေးပေါ်မှာ ပစ္စည်းတွေကို အပြည့်အသိပ်တင်လာတဲ့ကားတွေ ရှိသလို လူလေး ၂ ယောက်လောက်ပဲ ပါတဲ့ ကားတွေလည်း ဖြတ်သွားနေ တုန်းပဲ။ ခဏနေတော့ မြေပဲပြုတ်ရောင်းတဲ့ လှည်းကလေး တစ်စီးက တိုက်တန်းရှေ့ကနေ ဖြတ်သွားတယ်။ “ရွာမလိုလို….လာမလိုလိုနဲ့…. လေယူရာ ပါသွားတဲ့ မိုးတိမ်လို….မြင်သာမြင် မကြင်ရတဲ့မျက်နှာ” တဲ့။ မေမြို့မိုးနဲ့အတူ မြေပဲပြုတ်ရောင်းနေတဲ့ ဦးလေးကြီး။ မြေပဲပြုတ်ဗန်းရဲ့ ဇကာ အကြိုအကြားကနေ ထွက်လာတဲ့ ရေနွေးငွေ့တွေဟာ မီးချောင်းသေးသေးလေးရဲ့ အောက်မှာ တွန့်ခွေလို့။ သေသေချာချာ ကြည့်လိုက်တော့မှ အဲဒီဦးလေးကြီးရဲ့ ခြေထောက်တွေကပါ ယိမ်းယိုင်နေသလို။

အင်းလေ…ည ၁၂ နာရီဆိုတာ အသက် လူကြီးတစ်ယောက် အိပ်ရာထဲ ရောက်နေသင့်တဲ့ အချိန်ပဲ။ ဒါလည်း အဲဒီဦးကြီးရဲ့ နောက်ဆုံးလက်ကျန်ဖြစ်ချင်ဖြစ်မှာပေါ့။  ဒါကုန်ရင် သူအိပ်လို့ရပြီပေါ့။ ဒါပေမယ့် သူအိမ်ရောက်ရောက်ချင်းရော အိပ်လို့ရပါဦးမလား။ တကယ်လို့ နောက်တနေ့မနက်မှာပါ ဈေးထရောင်းရဦးမယ်ဆိုရင် သူ့မှာ အိပ်ချိန်ဘယ်လောက်ရှိမလဲ။ ဒီလိုဆိုရင် သူ့ကို ကူညီမယ့်သူမရှိဘူးလား။ သားထောက်သမီးခံ မရှိဘူးလား။ ဒါမှမဟုတ် လူမမယ်မြေးလေးတွေကိုများ ရှာဖွေကျွေးနေ ရတုန်းပဲလား …မေးခွန်းပေါင်းများစွာ။ ကျွန်မကသာ အတွေး အမျှင်မပြတ်ဘဲ ကျန်နေတယ်….မေမြို့မိုးကတော့ ကျွန်မကို ချန်ပြီး ခပ်လှမ်းလှမ်းကို ရောက်နေပြီ။

အဲဒီဦးလေးကြီးနောက်ကို လိုက်ကြည့်နေတုန်းပဲ  သူရောက်နေတဲ့ တိုက်တန်းဟာ မှောင်သွားတယ်။ ကျွန်မတို့ ဘက်လည်း ပါတာပေါ့လေ။ အော်… မီးပျက် သွားပြန်ပြီပေါ့။ ဒီတလော ကျွန်မတို့ဘက်မှာ မကြာခဏ မီးပျက်တယ်။ ချက်ချိန်၊ ပြုတ်ချိန်ဆိုရင် မီးက ပြတ်ပီ။ အခုလည်း ညကြီး ပျက်ပြန်ပြီ။ လမ်းမီးရောင်ကတော့ ခပ်သဲ့သဲ့ ကျန်နေတုန်းပဲ။ ဒါလည်း တမျိုးတော့ စိတ်ကူးယဉ်စရာ ကောင်းတာပေါ့လေ။ လမ်းမီးရောင်ရယ်၊ ကြယ်ရောင်ရယ်နဲ့ … ။ ဒီလို မပီဝိုးတ၀ါးကာလကို တိုးထွက်လာတာက

“ပြောင်းဖူးပြုတ် ပူပူလေး” “မုန့်ဖက်ထုပ် ပူပူလေး”

ဆိုတဲ့ အသံ နှစ်ခု။ ကျွန်မနားထဲကို ပြိုင်တူ တွဲပြီး ၀င်လာတယ်။ အသံ တစ်ခုက ချိုနွဲ့နေပြီး နောက်တစ်သံကတော့ စူးရှရှနဲ့ ကောင်ကလေး တစ်ယောက်ရဲ့ အသံ။ ခုနက မြေပဲသည်လိုပဲ ဒီအချိန်အထိ ဈေးရောင်းနေရတုန်းပဲ။ မီးရောင်မမြင်ရတဲ့ တိုက်ခန်းတွေ ဘက်ကိုကြည့်လိုက်၊ ဟစ်သံပေးလိုက်နဲ့ ဒီနှစ်ယောက်ဟာ သားအမိတွေပဲ ဖြစ်မယ်ထင်တယ်။ မီးလာတဲ့ အချိန်မျိုးဆိုရင် မီးလင်းနေတဲ့ အခန်းတွေဘက်ကို ကြည့်ပြီး ခေါ်နိုးနိုးနဲ့ ဟစ်ရောင်းကြမှာ။ အခုလို မီးရောင် မမြင်တော့ဘူးဆိုတော့ သူတို့လည်း အားလျော့နေမှာပေါ့။ ခပ်သုတ်သုတ်လျှောက်နေတဲ့ အမေနောက်ကို တောင်းကလေး ထမ်းပြီး လိုက်လာတဲ့ကောင်လေးဟာ လမ်းမီးတိုင် တခုနားကို ရောက်ခါနီးမှာ တခုခုကို ခလုတ်တိုက်ပြီး၊ (ဒါမှမဟုတ် ခြေချင်းလ်ိမ်သွားတာလည်းဖြစ်နိုင်တယ်) ခွေခွေလေး လဲကျသွားတယ်။ သူအော်နေတဲ့ မုန့်ဖက်ထုပ်ဆိုတဲ့ အသံမဆုံးလိုက်ခင်မှာပဲ တောင်းနဲ့ ကလေးဟာ တခြားစီ ဖြစ်သွားတယ်။

ကောင်လေး လဲသံကြားတော့ အမေလုပ်တဲ့သူက ပြူးပြူးပျာပျာနဲ့သူ့ခေါင်းက ဈေးတောင်းကို ချလိုက်တယ်။ ပြီးတော့ ကလေးကို တခုခု မေးလိုက်ပုံပဲ။ ကလေးက ခေါင်းခါ ပြတော့ ခြေကျင်းဝတ်ကို ကိုင်ပြီး နည်းနည်းစီ ခါကြည့်နေတယ်။ ကလေးကတော့ ရှုံ့မဲ့လို့။ နောက်ထပ်ပြီး ခါလိုက်တော့ ကလေးက အတင်းရုန်းလိုက်တယ်။ အမေက ဆက်မခါတော့ဘူး။ သူ့ရဲ့ ခေါင်းခုဝတ်ကို ဖြည်ပြီး ကလေး ခြေထောက်ကို ပတ်ပေးလိုက်တယ်။ ကလေးကလည်း နောက်ကို လက်ထောက်ပြီး အမေလုပ်ပေးသမျှ ငြိမ်ကြည့်နေတယ်။ အမေလုပ်သူဟာ သူထပ်ဝတ်ထားတဲ့ အပေါ်အကျီကို ချွတ်လိုက် ပြီး ကောင်လေးတောင်းပေါ် က ပြုတ်ကျသွားတဲ့ မုန့်ဖက်ထုပ်တွေကို ကောက်ယူပြီး သုတ်လိုက်တယ်။ တစ်ခုပြီး တစ်ခု…။ သူမကို ကြည့်နေတဲ့သူ တစ်ယောက်ရှိတယ် လို့ အမေလုပ်သူက ထင်မှာ မဟုတ်ဘူး။

မုန့်တွေကိုသုတ် ပြီးတာနဲ့ သူမရဲ့ ဈေးတောင်းကြီးထဲကို အကုန်ထည့်လိုက်တယ်။ အဲဒီအ၀တ်ကို ခွေပြီးတော့ ခေါင်းခုဝတ်လုပ် လိုက်တယ်။ နောက် ဓါတ်တိုင်ကို မှေးပြီး ဈေးတောင်းကို ခေါင်းပေါ်ရောက်အောင် ပင့်တင်လိုက်တယ်။ ကောင်ကလေးကို လက်တစ်ဘက် ကမ်းပေးလိုက်တော့ ကလေးက ယိုင်နဲ့နဲ့ ထလာတယ်။ ဘာမှရှိပုံမရတော့တဲ့ သူ့တောင်းလေးကို ခေါင်းမှာ စွပ်လိုက်တယ်။ အမေလုပ်သူ ရယ်လိုက်ပုံပဲ။ ကလေးက တောင်းကို ချက်ခြင်းပြန်ဖယ်ပြီး လက်တစ်ဘက်ကနေ ကိုင်လိုက်တယ်။ နောက်လက်တစ်ဘက်ကတော့ သူ့အမေလက်ကို ကိုင်ပြီး ထောနဲ့နဲ့ နဲ့ စမ်းလျှောက်ကြည့်တယ်။

နောက်တော့…သူတို့ လာခါစတုန်းကလိုပဲ “ပြောင်းဖူးပြုတ် ပူပူလေး” “မုန့်ဖက်ထုပ် ပူပူလေး” ဆိုတဲ့ အသံ ၂ သံ ပြန်ထွက်လာတယ်။ နည်းနည်းချိုတဲ့ အသံရယ်၊ နည်းနည်း စူးတဲ့ အသံရယ်… ဘာမှ သိပ်မကွာသွားဘူးလို့ ဆိုရပေမယ့် အမေလုပ်တဲ့သူအသံဟာ ပိုပြီး လေးပင် သွားတယ်လို့ ထင်လိုက်ရတယ်။ ခေါင်းမှာ ပိုသွားတဲ့ အလေးချိန်ကြောင့်လား။ ဒါမှမဟုတ် ကလေးအတွက် ပူပန်လိုက်ရတဲ့ သောက ကြောင့်လား။ နှေးသွားတဲ့ ခြေလှမ်းဟာ ကလေးကို စောင့်ခေါ်နေရလို့ ဖြစ်နိုင်သလို အမေရဲ့ မချိတင်ကဲ ဝေဒနာကြောင့်လည်း ဖြစ်လိမ့်မယ်။ သူတို့သားအမိတတွေ ဘယ်အချိန် အိမ်ပြန်ရောက်မလဲ။ အိမ်ပြန်ရောက်တဲ့အခါ သူ့သားကလေးကို လိမ်းပေးဖို့ ဆေးပူပူလေး တစ်မျိုးလောက်ရှိနေပါ့မလား။ စောစောတုန်းက မြေပဲပြုတ်သည်ကြီးတုန်းကတွေးမိတာနဲ့ မတူတဲ့ အတွေးတွေ ခေါင်းထဲကို တရိပ်ရိပ်ချင်း ၀င်လာတယ်။ ဖြစ်ပေါ်လာတဲ့ ဝေဒနာကတော့ အတူတူပါပဲ။

ဈေးသည် သားအမိလည်း ဝေးဝေးသွားပြီ။ မီးကလည်း ပြန်မလာသေးဘူး။ ဘက်ထရီကလည်း ကုန်သွားပြီဆိုတော့ အိပ်ဖို့ပဲ ကျန်တော့တယ်။ ဒီနေ့ ညအတွက် ရေးမယ်ဆိုတဲ့ အကြောင်းအရာတွေကလည်း စိတ်ကူးထဲမှာပဲ စာစီပြီး ဆက်သိမ်းထားလိုက် တော့တယ်။ တနေ့နေ့မှာ လိုင်းကားစီးရတဲ့ ၀ဋ်ဒုက္ခ အကြောင်း ကို မြင်သာထင်သာဖြစ်အောင် ကျွန်မရေးဖြစ်ချင် ရေးဖြစ်မှာပါ။ ဘကြီးရဲ့ ပုံပန်းသွင်ပြင်ကို ပုံဖော်ပြီးလည်း ရသမြောက်တဲ့ စာစုကို ဖန်တီးချင် ဖန်တီးဦးမှာပါ။ အဲဒါတွေထက် ကျွန်မသာ ပန်းချီ ဆွဲတတ်မယ်ဆိုရင်တော့ ချမရေးဖြစ်တဲ့ ဘ၀ ၂ ခု အကြောင်းကို ကင်းဗတ်စ အဖြူပေါ်မှာ မဖြစ်မနေ ကို ကောက်ကြောင်းဖော်မိဦးမှာပါ။ အဖြူ၊ အနက် ၂ ရောင်ပဲ သုံးမယ့် အဲဒီပန်းချီကားနာမည်ကိုလည်း သိပ်ပြီးတော့ မဆန်းတဲ့ နာမည်ပဲ ပေးလိုက်မယ်။

“ လှုပ်ခတ်နေသောကုန်ကြမ်း” လို့။

နှင်းနုလွင်

26၊ 11၊ 2011

33 views